ரங்கோலி அழகாய் வரைந்திருந்தாள்.
இருந்தாலும்
நெற்றியில் சரிந்து விழுந்த முடி ஒதுக்கையில்
கன்னத்தில் லேசாய் ஒட்டிக்கொண்ட வண்ணக்கீற்று
அதைவிட அழகாய்.
o
ரங்கோலி வரைந்துவிட்டு,
பக்கத்திலையே உட்கார்ந்து கொண்டு
எப்படி இருக்குது என்று கேட்கிறாள்.
கோலத்தை அழகென்று சொன்னால்
அது எவ்வளவு அப்பட்டமான பொய்.
o
மார்கழி முடிந்தபின்னும்,
அவள் வீட்டு முற்றத்தில் மட்டும்
மூன்று புள்ளி நெளிவு(நெளிந்த) கோலமொன்று
இன்னும் அழியாமல்.
o
மகள் கைபிடித்து, கோலம்போட
தேவதை அவள் சொல்லிக்கொடுக்க
பாதி தூக்கத்தில் நான் ரசித்துக்கொண்டிருக்க
எருமையை எழுந்திரிக்க சொல்லி
அம்மா எழுப்புகிறாள்.
கனவு (மட்டும்) கலைகிறது.
ஆண்டாள் அரங்கனை சேர்வதில்
ஒரு நாள் தாமதம் ஆகிறது.
- காதலிக்கப்படாதவன்
