குற்றுயிருடன் காதல்

 காதல் இன்னும்
இருக்கிறது


பரண் தூசிக்குள்
புதைந்து கிடக்கும்
அவனது நாட்குறிப்பில்


அவள் நினைவாய்
இவனது மகள் பெயரில்


கரையாத காதல்
அவள் கடவுச்சொல்லில்


தலையணை நிலத்தில்
தினம் பொழியும்
இவளது கண்மேக மழையில்


அவளது மின்னஞ்சல் பெட்டியுள்
என்றோ அனுப்பப்பட்ட
இவனது கவிதையில்


அவனது மின்னஞ்சல் பெட்டியுள்
என்றோ மறுமொழிக்கப்பட்ட
அவளது அச்சத்தில் 
 
மாலைமாற்றும் முன் இவ்வளவுதான்
என்று  சொல்லி அன்றுகொடுத்து 
இன்றும்  அவன் கழுவாமல் வைத்திருக்கும் 
அந்தக் கண்ணத்து எச்சிலில்

இவனது கரங்களால்
அவளது கூந்தலை அலங்கரிக்க
தினம் ஒடிந்த ரோஜாவின் தழும்புகளில்


அவள் மறுத்த இடத்தில் 
அன்று உடைந்து  விழுந்த
இவனது இருதய ரத்தக் கறையில்


காதல் இன்னும்
இருக்கிறது குற்றுயிருடன்


காதல் காதலாய் வென்றது வாழ்ந்தது
வெறும் க(வி)தைகளிலும் கனவுகளிலும் மட்டும்தான்